ევროკომისიამ ჩინეთში წარმოებული ელექტრომობილების იმპორტზე დროებითი ანტისუბსიდიური გადასახადების დაწესება გადაწყვიტა.

2024 წლის 12 ივნისს, გასულ წელს დაწყებული ანტისუბსიდიური გამოძიების წინასწარი დასკვნების საფუძველზე, ევროკომისიამ გადაწყვიტა ჩინეთში წარმოებული ელექტრომობილების იმპორტზე დროებითი კომპენსაციური გადასახადების დაწესება. გამოძიება რამდენიმე თვის განმავლობაში გაგრძელდება, სანამ კომისია არ გადაწყვეტს, შესთავაზოს თუ არა საბოლოო კომპენსაციური ზომები. შემდეგ წევრი სახელმწიფოები ამ წინადადებებს უყრიან კენჭს. ევროკომისიის განცხადების თანახმად, ეს გადასახადები დაემატება ევროკავშირის არსებულ 10%-იან ტარიფს. ეს მთლიანი ტარიფის განაკვეთს 50%-ს უახლოვდება. ამ დროებითი გადასახადების დაწესების გადაწყვეტილება მოჰყვა გამოძიებას იმის შესახებ, იღებენ თუ არა ჩინელი ელექტრომობილების მწარმოებლები სახელმწიფო სუბსიდირების მხარდაჭერას.

ევროკომისიამ, ევროკავშირის აღმასრულებელმა ორგანომ, გასული წლის ოქტომბერში დაიწყო გამოძიება იმის დასადგენად, ხელოვნურად დაბალია თუ არა ჩინური ელექტრომობილების ფასები სუბსიდიების გამო, რაც ზიანს აყენებს ევროპელ ავტომწარმოებლებს. ჩინეთის სწრაფად განვითარებადი ელექტრომობილების ინდუსტრია გლობალურ ბაზარზე მნიშვნელოვან მოთამაშედ იქცა. ევროკავშირი მიიჩნევს, რომ ჩინელი ელექტრომობილების მწარმოებლები შესაძლოა ისარგებლონ უსამართლო სუბსიდიებით, რაც ძირს უთხრის ევროკავშირის ავტომწარმოებლების კონკურენტუნარიანობას.

„ACEA-ს გენერალურმა დირექტორმა სიგრიდ დე ვრისმა განაცხადა: თავისუფალი და სამართლიანი ვაჭრობა ნიშნავს ყველა კონკურენტისთვის თანაბარი პირობების უზრუნველყოფას, თუმცა ეს გლობალური კონკურენტუნარიანობის გამოწვევის მხოლოდ ერთი სასიცოცხლო კომპონენტია. იმისათვის, რომ ევროპული საავტომობილო ინდუსტრია გლობალურად კონკურენტუნარიანი იყოს, ყველაზე მეტად ელექტრომობილების ძლიერი სამრეწველო სტრატეგიაა საჭირო. ევროკავშირის ავტომობილების ექსპორტის ღირებულებით, ჩინეთი სიდიდით მესამე ბაზარია შეერთებული შტატების (პირველი) და გაერთიანებული სამეფოს (მეორე) შემდეგ. 2023 წელს ჩინეთმა ევროკავშირში 438,034 სუფთა ელექტრომობილი გაიტანა, რომელთა ღირებულება 9.7 მილიარდ ევროს შეადგენდა. 2023 წელს ევროკავშირმა ჩინეთში 11,499 სუფთა ელექტრომობილი გაიტანა, რომელთა ღირებულება 852.3 მილიონ ევროს შეადგენდა. ბოლო სამი წლის განმავლობაში, ჩინეთში წარმოებული ავტომობილების საბაზრო წილი ევროკავშირში აკუმულატორზე მომუშავე ელექტრომობილების გაყიდვებში დაახლოებით 3%-დან 21.7%-მდე გაიზარდა. ჩინური ბრენდები ამ საბაზრო წილის დაახლოებით 8%-ს შეადგენენ (მონაცემები მოყვანილია: ევროპის ავტომობილების მწარმოებელთა ასოციაციის მიერ).